«Спадзяемся, што ў найбліжэйшы час жыццё парафіі адновіцца». Што адбываецца ў Чырвоным касцёле

 
9430
07 октября 2022 в 16:07
Автор: Оксана Красовская

Амаль два тыдні таму мы расказвалі пра пажар, які адбыўся ў Чырвоным касцёле. Здарэнне і яго наступствы не засталіся незаўважанымі, па горадзе пайшлі рознага кшталту гутаркі. Сёння курыя Мінска-Магілёўскай архідыяцэзіі вырашыла расставіць кропкі над «і» і распавесці, што зараз адбываецца. Прыводзім афіцыйнае паведамленне курыі.

У сувязі са з’яўленнем разнастайнай, часам супярэчнай інфармацыі ў розных сродках масавай камунікацыі адносна здарэння ў касцёле святога Сымона і святой Алены (Чырвоны касцёл) паведамляем:

  1. Пасля ўзгарання ў памяшканні сакрыстыі (прыбудова да касцёла), 26 верасня 2022 года, згодна з рашэннем камісіі па надзвычайных сітуацыях пры адміністрацыі Маскоўскага раёна горада Мінска (пратакол №5 ад 26 кастрычніка 2022 г.) забараняецца эксплуатацыя будынка. У сувязі з гэтым вядзенне парафіяльнай дзейнасці ўскладняецца.
  2. Касцельны камітэт парафіі стараецца весці канструктыўны дыялог з КУП «Мінская спадчына», якая з’яўляецца ўласнікам комплексу будынкаў Чырвонага касцёла (святыня і плебанія) на праве гаспадарчага вядзення, для хутчэйшай ліквідацыі наступстваў узгарання.
  3. Шукаюцца альтэрнатыўныя магчымасці для ўзнаўлення дзейнасці парафіяльнай супольнасці ў існуючых умовах.

Спадзяемся на плённае супрацоўніцтва з дзяржаўнымі структурамі рознага ўзроўню. Верым у тое, што святыня, якая была пабудавана вернікамі Каталіцкага Касцёла, і надалей будзе служыць вернікам. Спадзяемся, што ў найбліжэйшы час адновіцца жыццё парафіі.

Просім усіх вернікаў малітоўна падтрымаць парафіяльную супольнасць Чырвонага касцёла і прасіць Бога аб тым, каб аднаўленчыя працы ў сакрыстыі, у якой адбылося ўзгаранне, як найхутчэй завяршыліся.

Наш канал у Telegram. Далучайцеся!

Ёсць пра што расказаць? Пішыце ў наш телэграм-бот. Гэта ананімна і хутка

Автор: Оксана Красовская